released December 1, 2023

Музика за театарската претстава ,,Иванов'' според истоимената драма на Антон Павлович Чехов во режија на Зоја Бузалковска. Претставата е поставена и премиерно изведена во Македонски Народен Театар на 26.05.2023.

Original music score for the theater play 'Ivanov' by A.P.Chekhov, directed by Zoja Buzalkovska at Macedonian National Theater. The play was premiered on 26.05.2023.

Музика: Давид Ангелевски
Дизајн на омот: Давид Ангелевски
Фотографија: Кире Галевски

Претходни изданија/previous releases:
David Angelevski - Cudna slucka so kuceto vo nokta (muzika za teatarska pretstava) LP [Sharla LP/DR081] Skopje, MKD 2022

***

Еднаш, во една наша преписка по повод музиката во „Иванов“ од А. П. Чехов, Давид напиша во еден конкретен контекст, а јас ќе цитирам во проширен: „...Има таму потенцијал за звучна магија“. Правењето музика за театар може да открие и да насели многу непознати ќошиња во структурата на претставата и во таа смисла нејзиното креирање е огромен простор на слобода за композиторот. Но истовремено, во оваа авантура има и многу ограничувања и зададености, кои ако не се почитуваат, можат да изместат и дури и да срушат.
Како звучи музиката кога се поставува Чехов на вештачка карпа? Како да се задржат трагите од времето во кое е пишувана драмата (крајот на деветнаесеттиот век), а да се донесе до времето на жолти, портокалови, сини, зелени, розеви стапки и фаќалки? Како да прозвучат на едно место електрична гитара во рокерски стил, балалајка, виолончело, пијано, бубањ и електроника, како да се изгради атмосфера на „дувло на бувови“, во кое писокот е исто толку кобен, колку и текстот „пак писка бувот“? Како звучи тагата, немирот и чувството на ништожност на Иванов и леснотијата во младешката визија на вљубената, прогресивна Саша? Како звучи болеста, недоверието и очајот на Ана Петровна и татковската занесеност на Лебедев? Како звучат гробиштата во Париз на Шабељски, како звучи смртта?
И, како сето ова да прозвучи како точка на Cirque Du Soleil, во која една група актери, кои играат ликови што носат во себе и на себе безвременост, треба да ја изведат точката „Иванов“, закачени на јажиња за качување по карпа, кои ги штитат да не се смачкаат во провалијата додека се движат нагоре-надолу по стрмнините на животот полн со излишности? Циркус ли е ова? Или е тоа циркусот на животот од драмите на Чехов – понекогаш незадржливо смешен, понекогаш неподносливо тажен?
И, најпосле, како сето ова да не стане еклектика? Можен ли е воопшто распон од 125 години во една и иста тема, таков за да се почувствува мирисот на минатото, а сепак да прозвучи како сегашност?
Не секаде, не секогаш, не секој може да го насети и да го открие потенцијалот за звучна магија, а камоли да ја создаде. И ако сега се запрашам гласно, што му даде на „Иванов“ Давид Ангелевски, што го направи посебен и во музичка смисла, одговорот ќе биде само еден: она што го вети во нашата преписка, без да биде свесен за тоа - звучна магија...

Зоја Бузалковска